زواج أهلي

عمر: ليك، ليش مانعين الزواج المدني فيك تفسرلي؟ يعني شو المشكلة إذا تزوج واحد مسلم وحدي مسيحية، أو العكس؟

إدي: يعني حسب ما أنا بعرف، مشان يخففوا المناسبات والواجبات على الزوجين…

عمر: كيف هيدي؟!…

إدي: يعني تما يصير بدهن يصوموا مرتين ويعيدوا ولادة نبيين وساعة عيد الفصح وساعة ألسنة الهجرية… يعني صراحة، الحالة الإقتصادية بالبلد ما بتسمح…

عمر: طيب، وبلا ما يعيدوا!

إدي: لا! كيف بلا ما يعيدوا؟ لازم يكونوا مثال للتعايش الطائفي بالمجتمع يلي عايشين فيه!

عمر: على راسي، بس ما هوي ممنوع الزواج المدني أصلاً، فكيف بدن يكونوا مثال إذا هني ممنوعين إنو يتزوجوا بعض؟!

إدي: والله هيدي ما فكرت فيها…

عمر: طيب ماشي… سؤال تاني: إذا بكرا صار حرب أهلية، شو بيعملوا؟

إدي: يعني مثلهم مثل كل العالم، يا بفلو يا بينضبو بالملاجئ…

عمر: يا بيتسلحو!!!

إدي: لا! شو هالحكي هيدا؟!! ما هني مثال للعيش المشترك وما بيقدروا ينزلوا على الجبهات… أكثر شي فيهن يعملوا إنه يتسلحوا بإيمانهم ويتكلوا على الله.

عمر: طيب عال. على أيا الله منهن بدهن يتكلوا؟ تبع المسيحية أو تبع الإسلام؟

إدي: والله كمان ما فكرت فيها هيدي…

عمر: أففف… تعبتني. نزال جيب بيرة أنا فايت لف واحد ثاني…

إدي: اوكي نازل… بس بدي فوت على الحمام قبل.

Dedicated to O & E

Website Comments

  1. الذبابة

    Here’s an alternative ending for you:

    عمر: طيب عال. على أيا الله منهن بدهن يتكلوا؟ تبع المسيحية أو تبع الإسلام؟

    إدي: حسب من أيا ميلة جايي الصاروخ.

    عمر: وبركي جايي من عند الشيوعية؟

    إدي: ساعتها ما في لزوم يتكلوا على حدا، لأنو هودي ما الهن رب!

  2. صن يان شن

    عمر وإدي شكرا لهذا الحوار بس غاب عن فكركن شغلة كتير منيحة ….بس واحد من طرفي الزواج المدني كان فنان في السياسة التضاجعية صدقني مابعود في خلاف تجاه أي مناسبة …إدي دخيل عينك أنا مابحب البيرة لو فيك تجيب ((تكيلا)) بكون احسن …عمر خلي السيكارة تخينة شوي ناوي اعلن تعديل مواد القانون لاني اليوم رايد نام وفيق وانا بمارس سياسة تضاجعية…

Facebook Comments